Sarrera

Interneten sorreratik gaur egun ezagutzen dugun sareraino, aldaketa nabarmenenetakoa web 2.0 delakoa izan da. Web 1.0aren kontzeptuak norabide bakarreko komunikazioa izan du ardatz nagusia. Web 2.0ak, berriz, erabiltzaileak pasibotasunetik atera eta informazioaren kontsumitzaile hutsak izatetik informazioaren komunikatzaile ez ezik, sortzaile ere izatera pasarazi ditu. Hainbat dira horretarako erabiliak izan diren eta diren tresnak eta aplikazioak. Horietako batzuk: posta-elektronikoa, RSSak, berehalako mezularitza, wikiak eta konpartitutako fitxategiak, Facebook edota Twitter bezalako sare sozialak eta blogak. Hala ere, garrantzitsuena ez da tresna, horren atzean dagoen filosofia baizik. Osasun arloko profesionalok tresna hauek guztiak baliatu ditzakegu daukagun gauzarik preziatuena, ezagutza medikoa, konpartitzeko eta horretan oinarriturik kolaborazio eremu gero eta zabalagoak edukitzeko. Zeintzuk dira horiek erabiltzeko eremu batzuk? • Gaixoekiko komunikazioa • Profesionalen arteko komunikazioa • Osasun arloko ezagutzaren zabaltzea Honen guztiaren adibidea diren hainbat ekimen ezagutaraztea da komunikazio honen xedea. Irizpide horiek kontuan izanik, gure inguruko hainbat blogari elkartu ginen 2010eko azaroan Bilbon esperientziak eta ibilbideak konpartitzeko asmoz. Egia da osasun-arloko profesional euskaldunon parte hartze aktiboagoaren falta somatzen dugula. Neurri handi batean gure kontsultetan Interneterako sarrera ez dela luxua edo kapritxoa, eguneroko beharra baizik, gure praktika klinikoan laguntzen digulako, gure artean eta gure gaixoekin hobeto komunikatzen ahalbidetzen digulako. Eta, zergatik ez?, dibertigarria ere badelako.