El Correo egunkariko albistea da, otsailaren 24koa: Medikuntza graduan plaza gehiago eskainiko da datorren ikasturtean EHUn, eta oraindik aztertzeke dago ea lehentasuna emango zaien euskaldunei, helburua delako bi hizkuntzetan artatu dezaketen profesionalak trebatzea.

Euskal Herriko Unibertsitatea eta Eusko Jaurlaritzako Osasun Saila EHUn plaza gehiago eskaintzea negoziatzen ari dira, Medikuntza Ikasketak egin nahi dituzten ikasleak gero eta gehiago direlako, eta mediku-beharra aurreikusten delako. Jadanik 40 plaza gehiago eskaintzea baimendu  dute. Baina helburua euskaraz ere badakiten medikuak trebatzea da, eta egungo matrikulazioarekin ez litzateke nahikoa izango etorkizunean behar beste mediku euskaldun izateko (egun ikasleen % 40 matrikulatzen da euskaraz). Graduan sartzeko, nota da irizpide bakarra eta euskaraz eskaintzen diren plaza batzuk hutsik geratzen dira.

Aurreko ikasturtetik, Estatuko unibertsitate bakoitzak sartzeko baldintza propioak zehaztu ditzake. Horregatik, Eusko Jaurlaritza eta EHU aztertzen ari dira ea posible den euskaldunei lehentasuna ematea.

Dena den, alde guztiek azaldu dutenez, BAME (MIR) plaza gehiago ateratzea ezinbestekoa izango da, ez daukalako zentzurik ikasketak eskaintzea eta gero lanean hasteko aukerarik ez izatea.

Baliabide gehiago, irakasle gehiago fakultatean eta ospitaleetan, Galdakao  ikasteko zentro gisa onartzea: horra EHUren eskaerak, plaza gehiago eskaini bai, baina kalitatea bermatu ahal izateko.