Sarrera

Arnas birus sintzitialak (ABS) neoplasia hematologikoak dituzten pazienteetan erikortasun eta hilkortasun garrantzitsua eragin dezake, ospitalizazio-unitateetan kontrolatzen zailak diren agerraldi epidemikoak eraginez.

Helburuak

COVID-19 pandemiaren deklarazioa eta gero, ospitale tertziario bateko Hematologia Zerbitzuan gertatutako agerraldi baten ezaugarri epidemiologikoak eta ezarritako kontrol-neurri zuzentzaileak deskribatzea.

Metodoak

- Behaketa ikerlana, zeharkakoa eta deskribatzailea.
- Aztergai izan diren pertsonak: 2022/12/01etik 2023/01/19ra Donostiako Ospitaleko Hematologia Orokorreko Unitatean ABSgatiko infekzio sintomatikoa izan zuten osasun-langile eta 8 egun baino gehiagoz ingresaturiko pazienteak dira kasu-agerraldi moduan definitu zirenak.
- Ikerketa mikrobiologikoa:
• Kasuen baieztapena: Arnas-laginetan ABSren aurkako PCR-RT/Antigeno proba.
• Kontrolak: Azken kontaktutik zortzigarren egunera arte.
• Kasuen negatibizazioa: elkarren segidako 2 arnas-lagin negatiboekin, haien artean 48 orduko tartea errespetatuz pertsona asintomatikoetan.
• Karakterizazio genetiko molekularra berresteke dago.
- Neurri zuzentzaileak: Prebentzio Medikuntza (PM) Zerbitzuko erizaintzak behaketa aktiboari ekin zion prebentzio eta kontrol-neurrien betetzea hobetzeko.

Emaitzak

- 6 kasu baieztatu ziren (5 paziente eta osasun-langile bat). 4 pazienteen arteko espazio zein denbora lotura egiaztatu zen. Paziente guztiak (batezbesteko adina: 57,6 urte) haien neoplasien aurkako tratamendu aktiboa jasotzen ari ziren.
- PM-k 2023/01/03an jaso zuen lehen jakinarazpena, ordurako 4 kasu berretsita zeudelarik.
- 2023/01/04an neurri estandarren betetzean antzemandako hutsuneen zuzenketari hasiera eman zitzaion (eskuen garbiketa eta maskara, eskularru zein mantalen erabilera desegokia). Geroztik ez ziren kasu nosokomial berririk hauteman.
- Agerraldia 2023/01/19an eman zen amaitutzat. Ez zen hildakorik egon eta bost pazienteetatik bakarrak bete zituen negatibizaziorako ezarri ziren irizpideak.

Ondorioak

- Neurri estandarren betetze egokiak arnas birus sintzitialaren transmisioa eten zuen eta agerraldia kontrolatzea baimendu zuen.
- Neurri estandarrez gain, isolamendu neurriak ezartzea ere ezinbestekoa da arrisku handiko pazienteen artean ABSagatiko infekzioaren hedapena saihesteko.
- Arrisku handiko unitateetan, eta bereziki oporraldietan, ezinbestekoa da agerraldiak eragiteko gaitasuna duten infekzioen lotura epidemiologiko posibleen susmo eta jakinarazpen goiztiarra.

Bibliografia

Komunikazioaren testua PDF formatuan atxikituta.