Osakidetzako Euskara Planaren ebaluazioa egin zenetik osasun-erakundeak egindako bidea ideia nagusi bitan labur daiteke: Osakidetzak, batetik, bizkar eman dio ebaluazioari, proposatutako neurri zuzentzaile nagusietatik bat ere ez baitu bultzatu; bestetik, Euskara Planaren filosofiari eraso dio, ahaleginak egin baititu euskararen erabilera eta kalitatezko zerbitzuen arteko lotura apurtzeko, horrela koherentea izanik Gobernuko alderdiak eta oraingo osasun-sailburuak beti adierazitako jarrerarekin. Izan ere, inoiz ez dute ulertu euskaldunok zerbitzu eskasagoa jasotzen dugula gure hizkuntza eman ezik; horretaz oso bestera, beti esan dute euskararen ezagutza baloratzeak kalte egiten diola osasun-langileen maila profesionalari. Horrela, oso deigarria da Osasun Sailak euskararen erabilera nola kendu duen Osakidetzako programa-kontratuen kalitate-parametroetatik. Beraz, batetik, Euskara Planak ez du aurrera egiten, eta bestetik, atzera doa.