“Hori da errealitatea. Eta horri erantzun bat ematea dagokio Osasun Sailburuari. Herritarren eskubideak bermatzea dagokie Administrazioari eta Gobernuari. Erantzun egoki bat zor digu euskaldunoi". Hori esan du Hizkuntz Eskubideen Behatokiko zuzendariak, Garbiñe Petriatik Eusko Legebiltzarrean egindako agerraldian. Bertan, Osasun Sailburuak azalpenak eman behar izan ditu Debagoieneko Ospitalean herritar batek jasandako hizkuntza-eskubideen urraketa larrien inguruan.

Petriatik azaldu duenez, Behatokiak osasun-alorrari lotutako kexa andana jasotzen du. Behatokiak urtero osatzen duen txostenean "osasun alorra beltzuneetako bat da, kexen artean kexa kopururik altuena sortzen duen alorra da, ehunka kexa jaso ditu Behatokiak. Eta kontuan izanik euskaldunok ez dugula kexak jartzeko ohiturarik, amorruarekin joaten garela etxera, oso garbi dugu kopuru hori errealitate zabal eta gordin baten isla besterik ez dela. Hizkuntza-eskubideen urraketak Osakidetzan ere sistematikoak dira".