Zergatik eskatzen du gure ziztada BERRIAk?

Milaka laguntzaileren babes bila ari da Berria Taldea ‘Zure ziztada behar dugu’ kanpainan. Berrialagunak egiteko kanpaina da, batez ere BERRIA internetez doan irakurtzen dutenei zuzendua; baina dei handia izan nahi du, euskaltzale guztioi egindako deia, gogorarazteko BERRIA egunkaria egoera kezkagarrian dagoela, eta bizirik jarraituko badu laguntza eta babesa beharko dituela.

BERRIA sortu zenean ere gizarte euskaltzalearen ekimenak sortu zuen, Euskaldunon Egunkaria itxi zutenean zutik jarri zen komunitate horrek, eta orain ere euskaldunon komunitateak lagundu beharko dio bizirik irauten.

Krisi ekonomiko orokorrak eta hedabideen krisiak (paperetik interneterako bidea) bete betean harrapatu du baita ere BERRIA. Doikuntzak egiten ari da, irakurle berriak bilatzeko produktu eta zerbitzu berriak eskaintzen, interneten euskara besteen pare egoteko ahaleginean, baina halaz ere bera bakarrik eusteko gai ez delako izango plazaratu du ‘Zure ziztada behar dugu’ kanpaina.

Egoera argitu bitartean proiektua sustengatuko duten milaka ekarpen txiki behar ditu, bestela desagertzeko arriskua baitute.

Herriz herri kanpaina egiten ari dira, helburua delako BERRIA proiektuaren egoera bertatik bertara ahalik eta jende gehienari azaltzea, eta ze gogoeta egiten ari diren eta zein erabaki hartzen ari diren azaltzea.

Horrekin batera kultura munduko eta euskalgintzako sektore askoren atxikimendua erakutsi nahi du Berrialaguna kanpainak, komunitate hau osatzen dutenak asko direla eta BERRIA euskal kulturarentzat erreferentzia ezinbestekoa dela iritzi diotenak asko direla erakusteko.

Informazio gehiago helbide honetan duzue: www.berria.info/berrialaguna

zure ziztada behar dugu_ha.pdf