Iturria: Berria.eus

Zumarragako ospitalea (Gipuzkoa) «abangoardian» kokatu da irudi bidezko diagnostikoen alorrean. Herenegun, erresonantzia magnetikoko ekipamendu berria ezagutarazi zuen Osasun Sailak, eta, etzitik aurrera, martxan jarriko dute; orotara, 100.000 pertsona ingururi zerbitzua eskainiko die unitate berriak. Ordea, Osasun Sailak ez du argitu zerbitzua erabiltzen dutenek aukera izango duten erresonantzien txostenak euskaraz jasotzeko.

Iñigo Urkullu lehendakariak eta Jon Darpon Osasun sailburuak zuzenean ezagutu zuten azpiegitura hori; diagnosi gaitasuna handitzeko bide emango du. Ezaugarri teknikoei esker, gorputzeko egituren irudiak eskuratzea ahalbidetuko du, baita zuntz delikatuetan ere: garuna, zainak... Bereizmen handiko irudiak eskaintzen ditu, «teknika aurreratuenak» ahalbidetuz.

Osasun Sailak nabarmendu du azpiegituren eskutik hainbat alorretan ikerketak egiteko aukera egongo dela: neurologian, traumatologian, kardiologian... Horrez gain, irudiaren kalitateari esker, sendagileek zenbait gaitz lehenago atzeman ahalko dituzte, gaixotasun neurodegeneratiboak, adibidez. Halaber, tumoreen fase goiztiarrean lan egiterakoan zehaztasuna handituko du.

Etzi martxan jarriko duten ekipamenduak 800.000 euroren inbertsioa eskatu du, eta, Eusko Jaurlaritzaren iragarpenen arabera, 2015. urtean 4.500 pertsona inguru pasatuko dira handik. Halaber, ekipamendu berriak orain artekoak baino denbora gehiago behar du probak egiteko.

Irakurtzen jarraitzeko berria.eus