OEEkide agurgarria,

Seguruenik dagoeneko konturatuko zinenez, pazienteen hizkuntza aukera ikusgarri dago gure eguneroko lanean darabiltzagun aplikazio informatikoetan. Hau aurrerapauso garrantzitsua da, pazientearen hizkuntza aukera denontzat ikusgarri egitean, gure lana eta pazientearen gogobetetasuna hobetzea errazten duelako.

Ekimen hau II. Osakidetzako Euskara Planaren, 2.3. puntuan jaso zen eta abian jarri da. Euskararen erabilerarako oso lagungarria izan daitekeenez, OEEk ondorengo proposamena egin nahi dizue:

1) OEEko kide guztiok, mediku, erizain, administrari eta teknikariok, gure pazienteei euren lehentasunezko hizkuntzaren erregistroa ikusgarri dagoela esan behar diegu eta euskara lehenesteko aukera daukatela, bestela gazteleraz izango dutela, eremu hau sortzean, pazienteei gazteleraz lehenetsita utzi zaielako. Aukera hau eskainita, Legea eta gure jarduera arautzen duen kode deontologikoa errespetatuko dugu. Pazienteak euskara aukeratuko balu, horren erregistroa guri dagokigu egitea eta, horrenbestez, OEEk erakundeko bazkide guztiei aukera hori erregistratzeko gonbitea luzatzen dizue.

2) Bestetik, gauden zerbitzu edo unitate guztietako zuzendaritzari pazienteen lehentasunezko erregistroa bultzatzeko kanpaina abiarazteko proposamena egin ahal diegu, paziente euskaldunek behar bezala informatuta egon daitezen eta haien hizkuntza aukera ondo jasota egon dadin.

2015.02.12

OEE - Osasungoa Euskalduntzeko Erakundea

Osakidetzan aurkeztekoa.pdf