Iturria: Berria.eus

Mediku euskaldunen ordezkapenak osagile elebidunak beren plazatik kenduta egiten dituztela salatu dute Arrasaten, agerraldi batean

2015-06-18 / Nagore Ares Amaya

Leku batetik mediku euskalduna kendu, beste leku batean jartzeko. Uda heltzear dela hasi dira mediku euskaldunak ordezkatzeko arazoak. Egoera salatzeko agerraldia egin zuten atzo zenbait eragilek Arrasaten (Gipuzkoa). Osakidetzaren «planifikazio arazoez» mintzatu zen Aitor Montes Aramaioko (Araba) familia medikua. Osagile euskaldunik ez izateak, herritarren hizkuntza eskubideak urratu ez ezik, haien osasuna «kolokan» jar dezakeela ohartarazi zuen, erien dokumentazio klinikoa euskaraz jasoa baitago hainbatetan.

Montesek nabarmendu duenez, iaz egin bezala, aurten ere, oporraldietan mediku euskalduna bidaltzeko eskaera egin diote Osakidetzari Aramaioko Udalak eta medikuak berak. Sendagileak salatu du osasun zerbitzuak ez zuela aurreikusi bertora mediku euskalduna bidali behar zuela aurten, eta beste norabait joan behar zuen mediku euskalduna Aramaiora bidaliko dute; «beste leku bateko herritarren hizkuntza eskubideen kalterako».

Besteak beste, agerraldiarekin bat egin dute Uema Udalerri Euskaldunen Mankomunitateak, ELA eta LAB sindikatuek, Euskararen Gizarte Erakundeen Kontseiluak, Osasungoa Euskalduntzeko Erakundeak, Hizkuntz Eskubideen Behatokiak, EHUko Medikuntzako Asanbladak, EHE Euskal Herrian Euskaraz-ek eta Aramaioko, Antzuolako, Elgetako, Oñatiko eta Leintz Gatzagako udalek (Gipuzkoa). Haien ustez, Osakidetzak «irtenbide partzialak» eman dizkie hizkuntzaren inguruko arazoei, eta «betiere» herritarrek eta hainbat eragilek eta erakundek «presioa» egin eta gero.

Jose Maria Armentia Osakidetzako Giza Baliabideetako zuzendariak BERRIAri azaldu dionez, «urtero-urtero» ari dira indartzen mediku euskaldunen kopurua, eta ari dira «egoera hobetzen». «Baina ezin dugu dena egun batetik bestera konpondu». Nabarmendu duenez, Osakidetzaren euskara plan berria lehena izan da behin-behineko kontratazioen gaia jasotzen.