Otsailaren 14an agerturiko albistea dugu. Araba Unibertsitate Ospitaleko Barne Mediku Egoiliarrek sinadura bilketa bati ekin zioten, eta Dozentzia eta Gerentzia sailei helarazitako gutun batean azaldu zuten zergatik: defektuz lan-tresna guztiak gaztelaniaz, euskarazko materiala sortzeko baliabiderik ez, Euskara Zerbitzuko egitasmoak zokoratzea, etab. Kexa adierazpenen ostean, Osakidetzaren Euskara Plana betetzeko eskaera dago, besteak beste.

Azken finean, euskaraz ikasi eta lan egiteko eskubidea errespetatu dadila eskatu dute.

"Arabako Unibertsitate Ospitaleko Barne Mediku Egoiliarra naiz.

Euskaraz lan egin nahi duten medikuei Osakidetzak egiten dien harrera penagarria. Gutako zenbaitek Medikuntzako ikasketak euskaraz burutu ahal izan ditugu, eta beste zenbaitek ez dute horretarako aukerarik eduki. Hala ere, denoi errealitate desorekatu bera tokatu zaigu. [...]

Eskatzen du: [...]
Osakidetzaren 2. Euskararen Normalizazio Plana abiapuntu hartuta, berau betetzea:

1. Egoiliar berrientzako ate irekietan euskarazko harrera ekitaldiak sortzea, haiek lehenetsitako hizkuntzan izan daitezen.
2. Egoiliar berriei euskarazko harrera eskuliburua iritsaraztea, non hizkuntza-irizpideen berri emango zaien.
3. Etengabeko prestakuntza-eskaintza euskaraz bideratzea.
4. Zerbitzu-erakunde bakoitzeko harrera hautatutako hizkuntzan bideratzeko baliabideak jartzea.
5. Zerbitzu-erakundeek antolatutako prestakuntza espezifikoan (tailerrak, ikastaroak, saio klinikoak…), euskarazko prestakuntza-saioen kopuruak zerbitzu erakundeko langile gutxienez elebidunen portzentajearen parera iristea.
6. Tutore esleipenean hizkuntza irizpideak erabiltzea.

Gutun honek erantzun bat jasotzea nahi dut, eta Dozentzia taldeak / Gerentzia taldeak eskaera guzti hauei buruz duen informazio, aurreikuspen eta asmoak jakin nahi nituzke.
Euskalduna naizen heinean nire lankideen eta nire eskubidea delako Euskal Herriko Osasun Zerbitzua deritzonean euskaraz ikasi eta lan egitea."