Lanaren diapositibak gazteleraz edo ingelesez jartzea "begirune keinu bat" izango litzatekeela esan diote ikasleetako bati. Jakinarazpenak berak ere, gaztelera hutsean jaso ditu.

Berriak eta Naizek eman digute albistea: EHUko Medikuntza Graduko ikasle batzuk ohorezko matrikula lortzeko hautagaiak dira, baina epaimahaikideko bik euskaraz ez dakitenez, egin beharreko aurkezpena gazteleraz edo ingelesez egiteko eskaera egin diete ikasleei, lehenago gomendioa egin eta gero. Hizkuntz Eskubideen urraketa nabaria izateaz gain, ikasle euskaldunen lanak ez dira berdintasun egoeran ebaluatuko. Fakultateko dekanoak barkamena eskatu die, Euskara eta Eleaniztasun dekanordeak idatzitako gutun baten bidez. Epaimahaia, ordea, ez da aldatu nonbait.

Koofiziala ere ez den ingelesarentzat epaimahai berezia osatzen da eta euskararentzat (euskaldunontzat) hau?

Berriro ere haserrea piztu da Euskal Herriko Unibertsitatean Medikuntza gradua euskaraz ikasten ari direnen artean. Gradu amaierako lana gaztelaniaz edo ingelesez aurkezteko eskatu diete epaimahaiko kideek, euretako batzuk ez direlako euskaldunak. Lau dira egoera horretan dauden ikasleak. Leire Ugarte da euretako bat. «Ingelesez aurkezten diren lanetarako epaimahai berezi bat egoten da, eta kide guztiek ingelesa menderatu behar izan dute. Hori eskatzen dugu euskaraz eginiko lanentzat ere». Azaldu du urteroko kontua dela euskaraz ikasten dutenentzat.

[Jarraitzen du]