Duela egun batzuk Antsoain Nafarroako herriko pediatraren egoerari buruzko albistea agertu zen Berrian. Antsoainen pediatriako osasun-zerbitzua euskaraz jaso ahal izan da orain arte. Denbora luzez herriari euskarazko eta kalitatezko osasun-zerbitzua eman dion doktorea izan dute, baina plaza ez zen berea. Orain beste doktore bat dago, lekualdaketa bat dela medio. Doktore horrek ez dauka nahikoa ezagutzarik euskarazko zerbitzuak emateko.

Antsoaingo biztanleek hainbat bide erabili dute arazoari konponbidea emateko. Lehenik, Osasun Zentroan bertan galdetu zuten, eta harreran ez zekiten egoera behin behinekoa zen ala ez. Erantzunak ez zituen asebete eta, beraz, Osasunbideari galdetu zioten; haiek lekualdaketaren berri eman zieten, eta euskarazko arreta nahi bazuten ondoko herrira joan behar zutela esan. Egoera ikusita, Antsoaingo hainbat biztanlek Behatokiaren bidez Osasunbideari kexa jarri zioten. Erantzuna posturako eskakizunik ez zegoela izan zen, eta eskumena Nafarroako Gobernuari edo Parlamentuari zegokiela. Arartekoak ere adierazpenak egin dizkio Osasun Departamentuari: beharrezko neurriak hartzeko hizkuntza eskubideak errespetatuak izan daitezen.

Antsoaingo biztanleek eskaera argia dute: Nafarroako Gobernuak egoerari irtenbidea eman diezaiola, galdutakoa berreskuratzeko:

"Beraz, Nafarroako Gobernuari kalitatezko osasun zerbitzua eskaintzeko —pediatra euskalduna eskaintzeko— hartu beharreko neurriak lehenbailehen hartzea exijitu nahi diogu. Kendu digutena berreskuratu nahi dugu, eta lortu arte ez dugu etsiko".