"Osatuberri" Osakidetzako euskara-aldizkariaren 74. zenbakia (2024ko azaroa-abendua) kalean da jada. Ale berri honetan, Ruben Garcia Perez Bilboko Txurdinagako Osasun Zentroko pediatra eta OEEko kidea zena gogoratu dute. Joan den azaroan zendu zen.

Hona hemen Osatuberrin Ruben Garciari eskainitako hitzak:

Profesional konprometitua genuen Ruben. Euskadiko LMAko Pediatriako Elkarteko presidentea ez ezik, Euskal Herriko Pediatria Elkarteko kidea ere izan zen, baita “Hijos de Eva y Adán” blog solidarioaren argitaratzailea ere. Orobat, euskara maite eta sustatu egiten zuen. Haurrei beti zuzentzen zitzaien euskaraz, zalantza-izpirik gabe; Osakidetzan beti hartzen zuen parte euskararen erabilera zabaltzeko ekimen eta proiektuetan (profesional euskaldunen identifikazio-kanpainetan, Euskaraldian, hizkuntza-kudeaketa egokiak ezagutarazteko jardunaldietan, Itzulbiden…); Osasungoa Euskalduntzeko Erakundeko (OEE) bazkidea ere izan zen, eta Euskal Herriko Unibertsitatean “Hizkuntzen kudeaketa osasun arretan: euskara komunikazio klinikoan” izeneko graduondokoa egin zuen, lehen edizioan. Osakidetzako profesionalek lan-esparruko euskararen erabileraz dituzten pertzepzio eta jarrerak aztertu zituen graduondoko amaierako lanean.

Pediatra euskaldun nekagaitza zen Ruben, eta argi zuen pazientearen hizkuntza zein garrantzitsua den kalitatezko osa- sun-asistentzia emateko. Agur eta ohore, lankide.