OEEn ekimen interesgarri honen berri jaso dugu: JAUZIAK EUSKARAREN ALDE

Euskal Herrian, euskara hainbatetan ukatua da edo bigarren mailako hizkuntza bezala tratatua da.

Ondorioz, zortzi herritarretatik bakarrik batek euskaraz hitz egiten du, eta Ipar Euskal Herrian euskararen karrikako erabilpena apaltzen ari da.

Egoera horretan euskararen erabilpena oso eskasa izaten edo apaltzen segituko da.

 

Euskalgintzaren Kontseiluak ohartarazten duen bezala, euskara larrialdi egoeran da; ongi izatera pasatzeko, euskararen aldeko hizkuntza politikan jauziak egin behar dira.

 

Horiek hola, oraindik egiten ez duten Euskal Herriko erakunde sozial, kultural, ekonomiko eta politiko guziei, lehentasunez euskaraz aritzea eskatzen diegu, erran nahi baita bi jauzi egitea eskatzen diegula: lehenik euskaraz aritzea eta gehienik euskaraz aritzea. Jauzi hauek ezinbestekoak dira Euskal Herri euskalduna, Euskararen Errepublika, eraikitze bidean.

 

Euskal Herriko erakunde sozial, kultural, ekonomiko eta politikoek euskararen alde jauziak egin ditzatela eskatzeko, jauziak dantzatuko ditugu.

 

Jauziak euskararen alde dantzatzeko lehen hitzordua, ekainaren 7an, larunbatez, ordu batak eta erdietan, Ziburuko Euskal liburu eta disko azokan izanen da, Patxi Perezekin. Jauzi horien artean bat berezia izango da, Zazpi Jauziak, kantatuz dantzatuko dugulako.