INGUMA datu-baseak 25. urte betetzen ditu eta urteurreneko ekitaldia antolatu du UEU Udako Euskal Unibertsitateak. Ospakizuna azaroaren 5ean (asteazkena) izango da, 18:30ean, Bilborock aretoan (Mesedeetako Kaia, 1. Bilbo). Joan nahi izatekotan, bidali mezu bat ondoko helbide elektronikora: komunikazioa@ueu.eus

INGUMA datu-baseak 1968tik unibertsitate-mailako zientzia- eta jakintza-arloetan euskaraz ahoz eta idatziz sortu diren lanen oinarrizko informazioa biltzen du: nork, zer eta noiz argitaratu duen. Komunitate zientifiko-intelektualaren euskarazko ekoizpena bildu, aztertu eta zabaltzea dugu xede: euskarazko jakintza eta ikerketa-lanak dokumentatu eta eskuragarri jartzea; euskal komunitate zientifikoari ikusgarritasuna emateko eta euskarazko ikerketa zabaltzeko baliabide bat eskaintzea, eta, euskal hiztunen artean ezagutza sustatuz eta euskarazko jakintza-sarea indartuz, goi-mailako euskara teknikoa eta akademikoaren prestigioa eta ikusgarritasuna areagotzea. Ekoizpen zientifikoa euskaraz sortzearen balioa aldarrikatzen dute Inguma datu-basearen sortzaileek, eta esparru akademikoan aintzakotzat hartua izateko lan egiten dute.