OEE – OSASUNGOA EUSKALDUNTZEKO ERAKUNDEA,
Batuz Aldatu adostasunerako dinamikaren sinatzaileok:
Euskalgintzaren Kontseiluak PIZKUNDERAKO ERRONKA aurkeztu genuen, 2036. urterako 300.000 euskaldun gehiago lortzea proposatuz. Hau da, hamar urteko epean euskalduntzearen erritmoa bikoiztea, urtero 30.000 hiztun irabazteko eta erabileran % 20ko langa gainditzeko.
Sinatzaile zareten Batuz Aldatu dokumentutik abiatuta, Erronka definitzeko nazioarteko esperientziatan oinarritu gara, hala nola, Galeskoan, Kataluniakoan eta Galiziakoan, eta bertako adituek ekarpena balioetsi dute.
Euskara larrialdi linguistikotik atera eta indarraldi berri batera eramatea da erronkaren xedea, gizarte guztiaren inplikazio eta bultzada bilatuz: euskalgintzarena, erakunde publikoena, eragile sozial eta politikoena, eta, oro har, euskarari etorkizuna eman nahi dioten herritar guztiena.
Erronkari babesa adierazteko, ekainaren 13an Iruñeko kaleak beteko dituen Euskaltzaleon Martxara joatera deitzen zaituztegu Euskal Herri osoko euskaltzale guztioi, euskaraz bizitzeko behar den dena aldarrikatzera!
