ONDORIOAK

Azken lanen azterketa egin ondoren, sabelaldeko traumatismo larrien tratamenduan ondorengo puntuak hartu behar ditugu kontuan:

1. Shock-egoera larri baten aurrean, sabelaldeko odoljario larri bat bilatu behar da. Odoljario hau baieztatzen bada, ebakuntza azkarra egin behar da, kalteen kontrolerako kirurgia erabiliz. Lehen ebakuntza honek ahalik eta motzena izan behar du, hemostasia lortzeko asmoz, eta hipotermia, azidosia eta koagulopatiara daraman ebakuntza-denbora luzea ekidinez.

Lehen ebakuntza honetan sabelaldeak presio handia har lezakeela ikusten bada, ez da sabelaldea itxiko, sabelaldeko sindrome konpartimentala ager ez dadin. Gaixoaren egoera hobeagotzen denean, bigarren ebakuntza bat egingo da, egiturak konpondu eta sabelaldea ixteko.

2. Hipotermiak eta odoljario larriek koagulopatia-egoera bat sorrarazten dute askotan. Kasu hauetan, odoljarioa gelditzeaz gain, eta galdutako odolaren deribatuak ezartzeaz gain, VII faktore aktibatua erabil liteke, galera-puntuetan hemostasia hobetzeko asmoz.