15. Osasun Jardunaldiak: Adimen Osasuna Oztopoak Gainditzen
INFEKZIO ESTREPTOKOZIKOARI LOTUTAKO TIK KONPLEXUAK (PANDAS): KASU KLINIKO BATI BURUZ
Egileak: ION ÁLVAREZ * , T DURÁ ** , M.E. YOLDI ** , OLATZ OLAZIREGI * , Y SALICIO *** , LOREA IMIRIZALDU**
*Neurofisiologia Klinikoko Zerbitzua. ** Neuropediatriako Saila. *** Mikrobiologiako Zerbitzua. Bideko Ama Ospitalea. Iruña / Nafarroako Ospitalea. Iruña.
Sarrera
SARRERA
Tik motorea oharkabeko mugimendu labur, azkar, errepikakor eta kontrolagaitza da; tik fonatorioa bat-bateko ahoskatzean datza. Itxuraz nahigabe gertatzen dira baina, sarritan, denboraldi batez kontrola daitezke. Haurtzaroan azaldu ohi dira, sinpleak (bakarka) edo konplexuak (tik multzoa) izan daitezke eta inoiz urteak pasa ahala desagertzen dira. Tiken etiopatogenia ezezaguna da baina badaude ebidentzia immunologiko eta klinikoak, tik primario batzuk infekzio estreptokozikoarekin lotzen dituztenak. PANDAS deritzo Streptococcus pyogenes bakterioaren infekzioarekin lotutako desoreka neuropsikiatriko autoimmune pediatrikoari.
Helburuak
KASU KLINIKOA
13 urteko gizonezkoak zenbait muskulu multzori (betazalak, ahoa, lepoa eta sorbaldak) erasaten zioten tik motoreak zeuzkan, bizpahiru urtez geroztik, bilakaera irregularrarekin. Emoziolabilitatea eta ikasketa arazoak zituen. Aurrekari familiar eta pertsonalak interesik gabe. Ez zuen farmakorik hartzen. Azterketa fisiko eta neurologiko normalak, tikak salbu. Azterketa osagarriak: hemograma, biokimika eta tiroide-hormonak, normalak; Elektrokardiograma, toraxeko erradiografia eta ekokardiograma, normalak; Elektroentzefalograma normala; ASTO (antiestreptolisina-O) 1240 UI/mL (normala<200); faringe-frotis negatiboa. Penizilina bentzatinarekiko tratamendua hasi zuen eta, ondorioz, tikak desagertu zitzaizkion eta hobera egin zuen egokitze psikosozialak.
Metodoak
EZTABAIDA
Gaixoak tik motore konplexuak ageri zituen, pubertaroa hasi baino lehen. Gero aldizkako garapen kronikoa izan zuen, larriagotzeetan sintoma psikiatrikoekin lotuta; gainera infekzio estreptokozikoa izana zuen. Honela, PANDAS gaixotasunaren irizpide diagnostikoak betetzen dira.
Ondorioak
ONDORIOA
PANDAS gaitzaren maneiua eztabaidagarria bada ere, penizilinarekiko tratamenduak izan ohi duen erantzun positiboak gaixoak S. pyogenesaren infekzioa izan ote duen bilatzera eraman beharko luke eta, ondorioz, profilaxi antibiotikoa probatu.
Azken Berriak
Osagaizen ale berria kalean da!
ELAk arreta euskaraz bermatzeko eskatu dio Osakidetzari
