Sarrera

Bizkarrezurreko unitateak 6 urte daramatza jadanik lanean, eta nahiko genuke gure esperientzia eta emaitzak plazaratzea. Hau argitaratzeaz gain, gure asmoa da Bizkarrezurreko Eskolaren kontzeptua azaltzea medikuntza-arloan eta batez ere bizkarreko arazoekin lan egiten dutenei. Laburbilduz, BEk gizakiari (hau da, eriari) eskatzen dio parte-hartze aktiboa izatea ongizate-prozesuan. BEn eriei begi-bistan jartzen dizkiegu, alde batetik, beren minean eragiten duten faktoreak (bizimodu-ohitura kaskarrak, lan-munduko postura txarrak, estresak eta ariketarik ez egiteak eragindako kalteak...), eta, beste aldetik, erakusten zaie zer egin behar duten prozesu hau hobetzeko. Amaitzeko, eriek argi eta garbi eduki behar dute beraiek arduratu behar direla beren gorputzaz beste inor baino gehiago, eta osasun-prozesuan beren partaidetza ezinbestekoa dela.