Sarrera

D bitamina ezinbestekoa da kaltzioa xurgatzeko eta hezurrak indartsu mantentzeko. Eguzkitan maiz eta denbora laburrean egoteak beharrezko kantitatea ematen dio biztanleriaren gehiengoari; kopuru txiki bat, aldiz, dieta bidez (arrain koipetsuak, haragia, arrautza gorringoak...) eskuratzen da.
D bitaminaren mailak odolean neurtzen dira, 25-hidroxi D bitamina -25(OH)D- analizatuz. Alabaina, ez dago 25(OH)D neurtzeko teknika estandarizaturik, urritasuna adierazten duten gutxieneko puntuak ez dira ebidentzian oinarritutako prozesu baten bitartez ezarri eta desadostasunak daude tratamendua hasteko erabili behar den maila serikoari dagokionez.
25(OH)D-ren kontzentrazioak aldakortasun handia du urtaroaren, adinaren, GMIren, arrazaren, azal-pigmentazioaren, eguzki-esposizioaren, elikaduraren, bizimoduaren eta faktore genetikoen arabera, eta ezaugarri horiek kontuan hartu behar dira, laborategiari analisia eskatzerakoan eta emaitzak interpretatzerakoan.
Nazioartean gertatu bezala, Osakidetzan 25(OH)D-ren determinazioek gora egin dute azken urteetan. Laborategiko proba eskatuenetarikoa da. Gainera, aldi berean hazi egin da D bitaminaren gehigarrien kontsumoa EAEn.
Orain arteko ebidentziak ez du frogatu D bitamina neurtzeak onura klinikoa duenik biztanleria orokorrarentzat, baldin eta sintomarik eta urritasun-arriskuko faktorerik ez badago. Gizartean, ordea, gehigarriak hartzea ohitura zabaldua da, eta kontsumoaren hazkundeak determinazio kopurua handitzen du ezinbestean, ekintza biak justifikatuta egon ez arren.