Sarrera

Adenopatiak pediatrian ohiko kontsulta izaten dira, eta kasu batzuetan ospitaleratzea behar izaten dute. Nahiz eta tuberkulosia ohiko kausa ez izan, kontuan hartu beharreko diagnostikoa da.

Helburuak

Honen inguruan, ospitalean ikusitako 2 kasu azaldu nahi ditugu.

Metodoak

Bi haurrak bertan jaio ziren. Ez batak ez besteak ez zuen aurrekari garrantzitsurik, BCG txertoa jarrita zuten, ez zuten animaliekin kontakturik eta ez zuen bidaiarik egin azken hilabeteetan. Ez batak eta ez besteak ez zuen sintoma sistemikorik.

Emaitzak

Lehenengo kasua 9 hilabetetako ume batena da. Eskuineko lepoaldean, azken hilabetean zentimetro bateko adenopatia zuen. Antibiotikoarekin tratatu zen, inolako hobekuntzarik gabe. Toraxeko erradiografia normala izan zen eta ekografian abzifikaziorik gabeko adenopatia ikus zitekeen. Mantouxa: 17mm. Orratz finaren bidezko ziztada (OFZ) positiboa izan zen Mycobacterium Tuberculosis Complex-arentzako. 6 hilabetetako tratamendu antituberkulosoa jarri zitzaion eta emaitza onak izan zituen. Ikerketa egiterakoan, aitak biriketako tuberkulosia zuela antzeman genuen.

Bigarren kasua 30 hilabeteko haur batena da. Azken hilabetean eskuin azpimasailezurrean adenopatia bat zuen. Azken 24 ordutan loditu egin zitzaion eta beraz, kontsultatzea erabaki zuten gurasoek. Toraxeko erradiografia normala izan zen eta ekografian adenoflemoia ikus zitekeen. Hasieran benabarneko antibiotikoarekin tratatu genuen. Hobekuntzarik ez zegoela ikusterakoan, tuberkulosia diagnostikatzeko probak egitea erabaki genuen. Mantouxa: 10mm. OFZ: Mycobacterium Tuberculosis Complex. Tuberkulosi interferoia: positiboa. Kasu honetan ez genuen kontakturik aurkitu.
 

Ondorioak

Ganglioetako tuberkulosia birikaren kanpoko tuberkulosi forma ohikoena da haurrengan, nahiz eta ez den ohikoa gure inguruko umeengan ikustea. Tuberkulosia endemikoa den herrialdeetatik datozen immigranteengan ikusten dugu maizago. Unilaterala izaten da eta normalean ez du sintoma sistemikorik azaltzen. Mantouxa positiboa izaten da eta toraxeko erradiografia negatiboa %70ean. OFZ bidez diagnostikatzen da eta tratamendua ondo doakio. Erauzketa kirurgikoa ez da beharrezkoa izaten gehienetan.

Bibliografia