Berriki prentsan argitaratu denez, Osakidetzak eskaintzen dituen zerbitzu elebidunak herritar euskaldunen aurrean identifikatzeko sistema integrala dauka, bai langile bakoitzari dagokionez bai unitatearen mailan. Sistema horren helburua herritarrari osasun-arreta euskaraz jasotzeko bidea erraztea litzateke, herritarrak begirada batez jakingo lukeelako euskaraz zein unitatek eta langilek artatu ahal duen, haztamuka edo galdezka ibili gabe.

Osasungoa Euskalduntzeko Erakundeak (OEE) horrelako proiektu baten aldeko jarrera erakutsi nahi du, euskaldunari ahalik eta gehien erraztu behar baitzaio bere hizkuntzaren erabilera. Azken mendeetan, hala ere, kontrakoa egin da, izan ere, euskaldunari gero eta eragozpen gehiago jarri zaizkio, bere hizkuntza alboratu eta bere burua ukatuz.