Aurten ere txuleta eta sagardoa, ikasleak eta langileak, sanitario eta ez-sanitarioak, bertsoak eta diagnostikoak… apirilaren 12ak denak uztartu zituen Hernaniko sagardotegi batean.

Giro ezin osasuntsuagoan aritu ziren erizaintza eta medikuntzako eskolako ikasleak Donostia Unibertsitate Ospitaleko langileekin batera, guztira 60 lagun inguru.

Gainera, aurtengo berrikuntzak erantzun bikaina izan zuen: deialdia zabaldu egin zen langile ez sanitarioek ere parte har zezaten.

Manu Goioganak, Karlos Ibargurenek eta Felix Zubiak kantatutako 30 bertsoen arrastoei jarraituta asmatu zituzten partaideek ezkutuko diagnostikoak.

Lehia handiko saioa izan zen honetan Uxue Goenaga erizainak, Ander Timoteo medikuak eta Marta Goikoetxea administrariak osatutako taldea suertatu zen irabazle. Gure zorionik beroena finalistei eta irabazleei! Gainerakoei… eutsi animoari, gero eta gertuago daukagu-eta hurrengo bertso-saioa!