Osakidetza euskalduntzeko iaz abiatutako sentsibilizazio kanpainaren harira, Bilboko Zazpikaleetako osasun zentroko pofesional eta gaixoek bideo bat grabatu dute.

Hiru bat minutu dirauen bideoan, Osakidetzako edozein osasun-zentrotan, eguneroko jardunean eman ohi diren hizkuntza-egoerak grabatu dira, eta guztira 40 langile inguruk hartu dute parte. Helburua osasun-arreta euskaraz jasotzera eta ematera animatzea da.

Azaldu bezala, bideo hau “Euskaraz bai sano” kanpainaren baitan kokatzen da. Hain zuzen, edozein osasun-zentrora zein ospitalera joanda ere, erabiltzaileak lehenengo begi kolpean ikusiko ditu euskaraz komunikatzera animatzeko kartelak, ikurrak, triptikoak zein profesional elebidunak pin eta etiketa identifikagarriak jarrita. Honi esker, beraiekin euskaraz jardun nahi izanez gero, hala egiteko aukeraren berri eman nahi da.