Uema Udalerri Euskaldunen Mankomunitatearen barnean Euskal Herriko 71 udalerri daude. Horietatik 42tan ez dago bermatua oinarrizko osasun zerbitzua euskaraz jasotzeko eskubidea.

Arazorik larriena, hala ere, pediatrena da, izan ere, Uemako kide diren hemezortzi udalerritan haurrek medikuarekin gaztelaniaz hitz egin behar dute, herri horietan ez baitago pediatra euskaldunik. Bestalde, 30 udalerritan arazoak dituzte familia medikuarekin euskaraz komunikatzeko.

Uemako ordezkariek Donostian egindako agerraldian adierazi zutenez, oinarrizko osasun zerbitzuei erreparatzeak izan behar du lehentasuna, zerbitzu espezifikoetan euskararen egoera «okerragoa» den arren. Halaber, Nafarroako egoera oso kezkagarritzat jo dute, Mankomunitateko kide diren hamalau udalerrietatik batek ere ez duelako bitartekorik oinarrizko osasun zerbitzua «osotasunean» euskaraz emateko.

Pediatra euskaldunik gabeko Uemako herriak:

Gipuzkoa: Aduna, Azpeitia, Deba, Oñati eta Usurbil.

Nafarroa: Arbizu, Arantza, Areso, Bera, Etxelar, Etxarri Aranatz, Goizueta, Igantzi, Lesaka eta Leitza.

Bizkaia: Lekeitio

Araba: Aramaio

Informazio gehiago Berrian