Debagoiena eskualdeko hainbat osasun-profesionalek odol-analisien emaitzak euskaraz eskatzeko proposamena egin dute. Beraien esanetan, proba osagarri guztien emaitzak gaztelera hutsean jasotzen dira, nahiz eta legeak elebitan izan behar direla adierazten duen.

Horren aurrean, osasun-langilen eta erabiltzaileen hizkuntza eskubideak babesteko alde batetik, eta bestetik euskara aldi berean lan-hizkuntza eta zerbitzu-hizkuntza izan dadin, odoleko analisiak euskaraz jasotzeko (eta pazienteei eskaintzeko) eskaera egin nahi dute.

Hala, lankideei deia luzatu diete, datorren astelehenean, irailaren 30ean, eskaera-testu bera erabiliz, bakoitzak bere unitatean odoleko analisien emaitzak euskaraz eska ditzatela eskatuz. 

Eskaera bideratzeko hainbat bide proposatu dituzte: bakoitzak bere unitate-buruari (JUAP) eta zuzenean edo FAXen bitartez, norbere erakundearen zuzendaritzari (Eskualdea, ESIa, ospitalea...); beste bide bat, Osakidetzako Euskara Zerbitzuko buruari, Xabier Arauzori (xabier.arauzouriarte@osakidetza.net) e-postaz bidaltzea litzateke.

Berrian ere horri buruzko albistea kaleratu dute.

ANALISIAK ESKATZEKO TESTUA.docx