Giro ezin hobea izan dugu asteburuan Miramarren. 24. Osasun Biltzarra, zalantzarik gabe, oso arrakastatsua izan da; 150 parte-hartzailetik gora bildu dira ostiral eta larunbatean, gehienak, osasun-arloko langile eta ikasleak. Urtero legez, Biltzarrean jorratu diren gaiez gain, osasun-profesionalek elkar ezagutu eta esperientziak trukatzeko aukera izan dute. Harrera ekitaldian, gainera, erakunde desberdinetako ordezkariak izan dira, tartean Jon Darpon Osasun Sailburua.

Gai guztiek osasun hezkuntzari buruzko ikuspegi ezberdinak ezagutzeko aukera eskaini dute, eta bai mahai-inguruetan eta baita komunikazio eta tailerretan ere, jendearen erantzuna oso ona izan da. Aipatzekoa izan da, batez ere, mahai inguruek izan duten harrera ona, mahai-inguru bakoitzean 100 pertsonatik gora bildu baitira. Halaber, heriotzaren mahai-inguruak ikusmin berezia piztu du, eta Iñaki Peñaren “Aulki Hutsak” dokumentalak bereziki ukitu ditu parte-hartzaileak.

Ostiral arratsaldean ahozko komunikazioen eta tailerren txanda izan zen, eta parte hartzaileek beraien esperientziak partekatzeko aukera izan zuten. Azken urteotan tailerrek arrakasta handia izan dute, jendeak hainbat ezagutza praktikan jartzeko aukera izaten baitu.

Horrela, beraz, Osasungoa Euskalduntzeko Erakundeak Biltzarraren oso balorazio positiboa egin du, eta datorren urtera begira asmo berriak garatzen joateko konbikzio sendoa dauka.