Iturria: Busturialdeko Hitza

Muxikako Udalak jakitera eman duenez, Osakidetzak medikuaren udako ordezkapena egiteko «langile erdalduna» kontratatu du; horren aurrean, «kezka eta haserrea» erakutsi dute Muxikako Udalak, herri eragileek eta herritarrek. Izan ere, «Muxikako bizilagunek osasun zerbitzua ezin izango dute euskaraz jaso udaran».

Muxikako Udalaren ustez, «Osakidetzak ez ditu kontuan hartu ez bertako bizilagunak, ezta bertako errealitate soziolinguistikoa ere». Gainera, «administrazio publikoak zerbitzuak euskaraz eskaintzeko duen betebeharrari muzin eginda, Muxikako herritarren hizkuntza eskubideak urratuko» dituela Osakidetzak deritzo udalak.

Osakidetzaren erabaki horregaz, gainera, hainbat herritarrek gazteleraz komunikatzeko dituzten zailtasunak kontuan hartuta, zailtasun horiek are nabarmenagoak izango direla eta kritikatu du.

Hori guztia kontuan hartuta, bere «ezinegona» erakutsi dute udalak, herri eragileek zein herritarrek, eta, horren aurrean, lehenbailehen konponbidea eman diezaten eskatu die Osakidetzako arduradunei. «Muxikarrok osasun zerbitzuak euskaraz jasotzeko eskubide osoa daukagu, eta, beraz, zor zaigun begirune eta errespetuagaz joka dezala eskatzen diegu Osakidetzari».