Iturria: Bizkaiko hitza
"Erizaintzak interesa pizten du" eta ikasle askok ikasketa horiek hautatzen ditu. Egun, Bizkaiko Erizainen Elkargoan 7.000 elkargokide baino gehiago daude, eta Hego Euskal Herrian biztanle bakoitzeko dagoen erizain kopurua oso handia da: 1.540 erizan daude 100.000 biztanleko. Hala ere, erizain denek ez dute lanpostua "berehala" topatzen, nahiz eta duela hamarkada batzuk lan merkatuaren egoera bestelakoa zen. Maria Jose Garcia Etxanizek (Portugalete, 1955) ikasketak amaitu zituenean, 1976an, "oso profesional gutxi zegoen, eta erizainen zain zeuden". Titulua lortu aurretik, bazekien lanpostua zain zuela ospitaleetan eta osasun zentroetan. Gurutzetako Unibertsitate Ospitalean, Barakaldoko San Eloyn eta Galdakaoko erietxean aritu da. Egun, Barakaldoko oftamologia unitatean dihardu, eta Bizkaiko Erizainen Elkargoko presidente ere bada, era berean.
