Berrian argitaratutako eskutitz batean  hurrengo egoeraren berri izan dugu:

Sopelan bizi den ama bat alaba izan eta pediatrarenera joan zenean mediku euskalduna aukeratzea nahi izan zuen. Zoritxarrez,  Sopelan dauden hiru pediatretatik inork ez zekien euskaraz mintzatzen. Hori dela eta, amak egoera aldatzeko ibilbide luzea egin zuen: Osakidetzan erreklamazioa jarri, Alangoko (Algorta) pertsonal arduradunarekin hitz egin, sinadurak bildu, Sopelako alkatearekin batzartu, etab.

Kontua hurrengoa da, urtebete geroago ezer gutxi lortu du ama honek eta bere alabak pediatraren berbak maitekiro jaso arren ez ditu ulertzen.  Egoera aldatzeko nahiarekin Alangora deitu zuen berriro, eta jaso zuen erantzuna erreklamazio berri bat jartzeko izan zen.  Azkenik, azpimarratu egin du nahiz eta gure lurraldean hizkuntz eskubideak defendatzen dituzten oinarri juridikoak egon eta bere alaba XXI. mendeko Sopela euskaldunean jaio arren, ez duela bere medikua ulertzen.