Berria egunkarian Aitor Montesen artikulutik jasotako ideia batzuk aipatuko ditugu. Hasteko, Aitorren esanetan, osasun arretaz jasotzeko hautua eta eskaera aspalditik egin dute erabiltzaileek, langileok eta zenbait gizarte eragilek. Baina, hala ere,  osasun arretaz mintzatzen garenean, batzuentzat norberaren hizkuntzan jasotzea eskubide bat da eta beste batzuentzat hautu soila.

Hori horrela izanik, osasun-zerbitzua pazientearen hizkuntzan ukatzeak kalitateari kalte egiten dio, batez ere gaixoa ahuldade egoeran badago (haurrak, adinekoak, buruko arazoak dituztenak, minbiziak jota daudenak), horrela ekitatea hondatuz.

Are gehiago, artikuluan defendatzen den moduan, argi izan behar dugu osasuna eta hizkuntza uztarturik daudela, oinarrizko eskubideen esparruan bete-betean jotzen dutela, besteen pareko edo gorago. Beraz, behartuta gaude horren alde egiteko neurri egoki eta osasuntsuak hartzera.