Berriak dioenez, Hego Euskal Herrian osasun publikoko profesionalek iaz eraso gehiago pairatu zuten, guztira 910, eta egoera hobetzeko neurriak nahi dituzte. Bai Eusko Jaurlaritzako Osasun Saileko, bai Nafarroako Osasun Departamentuko arduradunek datuetan igoera izan dela onartu dute. Nafarroan %2 urritu dira eraso fisikoak, baina ahozkoak %40 ugaritu dira; EAEn, berriz, %31eko igoera jazo da. Langileen esanetan, kezkagarriena da gertatzen diren eraso guztiak ez direla salatzen eta, hortaz, zoritxarrez datuok erakusten dutena baino eraso gehiago gertatzen direla.

SATSE Euskadiko Erizainen Sindikatuak kanpaina bat abiatu du orain Ezerk ere ez du eraso bat justifikatzen lelopean, egunotan paparrean #StopErasoak dioen eranskailua daramatela. Besteak beste, kanpaina hiru talderi zuzentzen zaio: lehenik, pazienteei, egoera latzenetan ere erasoak onartezinak direla sentsibilizatzeko; bigarrenik, administrazioari, neurri prebentibo gehiago ezarri ditzan; azkenik, langileei, estres egoeretan ere erasoak ez normalizatzeko eta onartzeko.

Ikusten dute zertan hobetua: «Adibidez, pertsonala handitzen, eta trebakuntzan ere bai: egoera zailetan nola erreakzionatu, hor langileei baliabideak ematea garrantzitsua da». Gaiari buruzko informazio osoagoa ere nahi dute. Esaterako, behatoki bat du eratua Osasun Sailak gaia aztertzeko, baina eraginkortasun urria ikusten diote. «Geratuta dago. Gaiaren gaineko informazioa lantzeko benetako foro bat sortu beharko litzateke», azaldu du Gonzalezek.

Babesa ere nahi dute erasoen berri ematen dute langileentzat: «Askotan gertatutakoa jakinarazten duzu, baina bakarrik zaude. Gero, ateratzen zara lanetik, eta zu zaude batera eta bestera begira, pentsatzen hor egon daitekeela mehatxu egin dizun pertsona. Azkenean, bakarrik sentitzen zara».

Jarraitzen du [...]