Dakigunez, euskararen ezagutza izugarri igo da azken hamarkadetan, jende askoren ahaleginari eta elkarlanari esker; orain, ordea, urrats bat haratago emateko momentua heldu da. Hala, aurtengo abenduaren 3ko Euskararen Eguna berezia izango da: egun bakar batean euskara erabiltzera animatu beharrean, proposamena 11 egunetara zabalduko da, hamaika hitzak askotxo ere esan nahi duela aprobetxatuta. Horrela, azaroaren 23tik abenduaren 3ra, euskaraz ulertzen eta egiten dugun guztiok aukera izango dugu egunerokoan gehiago erabiltzeko, naturaltasun osoz!

Bai, hala da, Euskal Herriko 300 udalerritan hasiak dira antolaketan. Euskaraldia bi herritar motari dago zuzenduta. Batetik, ahobiziak, 11 egunez lehen hitza euskaraz egingo dutenak, eta ulertzen dutenekin mantendu ere bai. Bestetik, belarriprestak, euskararekiko jarrera positiboa izango dutenak: ulertzen dutela jakinaraziko diote solaskideari, eta euskaraz aritzeko gonbita egingo. Aukeratu zure rola eta animatu proiektu kolektibo honetan parte hartzera!

Eta, zeure herrian bertan antolaketetan lagundu nahi baduzu, aukera hori ere badago. Hainbat batzar ari dira egiten aurtengo Euskaraldia prestatzeko. Sartu webgunean, enteratu eta animatu!