Berrian irakurri dugunez, Osakidetzak programa pilotu berria abiaraziko du datorren astetik aurrera, umetoki lepoko minbizia detektatzeko. Era gradualean zabaldu nahi da, Debabarrenetik hasita ekainaren 28an, urte amaierarako Arabara iritsita, eta EAEko osasun-sistema osora orokortuta datorren urterako. 2023rako, berriz, baheketa-prozedura sistematizatu eta erabat txertatua egotea espero da, 25-65 urte arteko emakume guztientzat eskuragarri. Helburua, beraz, minbizi mota hori atzemateko baheketa-sistema bat garatzea da. Urkullu eta Darponen arabera, ez dago horrelako programa bat eskaintzen duen beste autonomia erkidegorik.

Hala, egun martxan dauden beste bi prebentzio-programak osatu nahi dira (kolon eta bularrekoa). Horrelako programak abiarazi dituzten herrialdeetan kasuak murriztu egin dira, baina umetoki lepoko minbizia, oraindik ere, andre gazteengan prebalentzia handiena duen bigarrena da.

Informazio gehiago, hemen [gaztelaniaz].

Baheketa sistemaren aurkezpena, astelehenean (Berriako argazkia).