Eusko Jaurlaritzak Interneten eduki kulturalak aurkitzeko bilatzailea abiarazi du: Liburubila (www.liburubila.euskadi.eus). Bertan, interesatzen zaigun liburua EAEko zein liburutegitan dagoen kontsulta dezakegu (guztira 845.000 liburu dago erregistratuta), eta 16.250 liburu digitaletan (e-book) sar gaitezke musu-truk. Horrez gain, 70.000 audiorako sarbidea ere badago, gehienak diskoenak, baita 1.600 filmerako ere. Irudiak, digitalizatutako dokumentuak, egunkariak, aldizkariak eta liburutegi zein mediateketako hainbat fitxategi ere bertan dago eskuragarri.

Gainera, EAEko Liburutegi Sarearekin koordinatuta dagoenez, mailegua bertatik egin dezakegu, liburutegira aurrez aurre joan behar gabe.

Edozein eduki bilatutakoan, zein hizkuntzatan dagoen adieraziko digu, beraz, erraza da euskarazkoak topatzea.

Udan irakurtzeko edo film bat ikusteko aukera ona, ezta?