Udalerri Euskaldunen Mankomunitateko ordezkariek agerraldia egin zuten atzo Donostian, UEMAk bi urtean behin egiten duen behaketaren datuak aurkezteko. Guztira, 616 langiletik 133k (%21,60k) ez du hizkuntza eskakizunik udalerri hauetan, non herritarren %70 baina gehiago euskalduna den. Nafarroaren kasuan, %68raino heldu da kopurua. Horrek esan nahi du jende gehiagok dakiela euskaraz osasun zerbitzuetan orokorrean, baina, oraindik ere, herririk euskaldunenetan bost langiletik batek ez du hizkuntza eskakizunik, eta herri batzuetan egoerak okerrera egin du.

Bestalde, UEMAk Nafarroako egoera azpimarratu du. Hizkuntza Eskubideen Behatokiak emandako datuen arabera, 144 kexa jaso ziren Nafarroan 2017an zehar. Kexa horietatik 75 (%52,1) osasun arloari dagozkionak dira. Eta, gainera, egoera onena izan daitezkeen lekuetan, elebitasuna erabat kolokan geratzen da oporraldietako ordezkapenen eraginez.

Eskubide urraketa betiko iraunkortu ez dadin, proposamen zehatza egin du UEMAk: “Unibertsitatean eragitea, eta oztopoak baino gehiago, fakultatetik eta osasun erakundeetatik ikasleei baliabideak eskaintzea euskaraz ikasteko eta euskaraz lan egiteko”.