Hedabideetan ikusiko zenuten EAEko Justizia Auzitegi Nagusiak epaia atera duela lanpostu guztietan derrigorrezko hizkuntza-eskakizuna jasota zuen Irungo udaltzainen lan-deialdia baliogabetzeko.

Kontseiluak eta Behatokiak dagoeneko bidali zuten lehen irakurketa hedabideetara. Horretaz gain, zuzendaritza-batzordeak urgentziazko bilera egin du, gaiaren larritasuna kontuan hartuta. Izan ere, justiziaren esku-hartze horrek eragin handia izan dezake etorkizuneko lan-deialdietan, eta herritarren eskubideen urraketa betikotzea ekar dezake. Azken boladan epaitegiak oso gogor ari dira jokatzen eskubideen alde hainbat instituziok hartzen dituzten neurriekin. Une oro erakusten ari dira, hizkuntza-politikaren eremuan azken erabakia haien esku dagoela, eta inolako arazorik gabe argitaratzen dituzte atzokoa bezalako epaiak indarrean dagoen legeari erreparatu gabe.

Hau guztia Kontseilua hizkuntza-politiketan eragiteko adostasunak jorratzen ari denean dator, eta beraz, argi uzten du beharrezkoa dela etorkizuneko hizkuntza-politiken norabidetzean ahalik eta adostasun zabalena lortzea, besteak beste, horrelako bidagabekeriak eragileok jorratu dugun bidetik urrun daudelako.

Horrela, KONTSEILUAk astelehenean, goizeko 10.30ean agerraldia egin du Bilbon. Bertan, zuzendaritzan dauden bazkideetako ordezkariak egon dira, baina gainerako bazkideei ere gonbidapena egin zaie bertan egoteko.

Agerraldian honako hauek azaldu dira:

1. KONTSEILUAk epaiari buruz egiten duen irakurketa, eta horrek izan ditzakeen ondorioak. Azken boladan hainbat epaitegitatik jokabide hori errepikatzen ari dela berretsi (Auztegi Gorena, Nafaroako Justizia Auzitegi Nagusia, EAEkoa..)

2. Gizarte guztiari eragiten dioten erabakiak dira, eta beraz, beharrezkoa da horren inguruan elkarrekin hausnartzea;  une honetan adostasun zabalak lortzea eta horrelako erasoei batera erantzun beharra azpimarratuko dugu.

Horretaz gain, aurreikusten diren bi ekimen aurkeztu dira. Batetik, eragile politikoak eta sindikalak ostegun arratsaldean Andoaingo Martin Ugalde Kultur Parkean antolatu dugun bileran parte hartzeko gonbidapen publikoa egin dugu, eta, bestetik, euskaraz bizi nahi duen komunitateak erabaki horiekin ados ez dagoela erakusteko larunbat honetarako, maiatzak 22, Bilbon, EAEko Justizia Auzitegi Nagusiaren aurrean, antolatu dugun mobilizaziorako deia.

Esan bezala, larritasunez bizi ditugu azken boladan gertatzen ari diren erasoak, eta zuzendaritza-batzordeak uste du badela unea horretan ere jauzia egiteko.