Medikuaren oinarrizko gaitasun profesionalak Maialen Berridik, OEEk antolaturiko azken Agote sariaren irabazleak, argitaratu berri duen liburu bat da.Tituluan argi aurkezten den moduan, mediku batek bere lana profesionaltasun osoz egiten duela bermatzeko beharrezko dituen oinarrizko gaitasunen ingurukoa da. Medikuntzako langileek eguneroko lanean izaten dituzten erronkak aurkezten dira liburuan, eta erronka berauei aurre egiteko zein balio pertsonal eta profesional beharrezkoak diren.

Desberdintasun sozialak ere tratatzen dituen lan bat da, etorkizuneko langileei zuzendua, gaixotasunen atzean dagoena azaltzen duena. Zein da gaixo baten testuingurua? bezalako galderei ere erantzuna ematen saiatzen da Maialen Berridi, gaixotasunen atzean dagoen pertsona bere osotasunean aztertzeari garrantzia emanez; horrela, medikuntzak izan dezakeen ikuspuntu berri bat aurkeztuz, edozein langile sanitariorentzako (bai erizain, mediku, edo bestelakorentzako) lagungarria izan daitekeen esperantzarekin.