Osagaiz aldizkariak hainbat berri izan ditu azken hilabetean. Hasteko, urtearen amaierarekin batera, aldizkariaren ale arrunteko 5. bolumenaren 2. zenbakia argitaratu da. Bertan, hainbat gai jorratu dira: COVID-19 gaixotasunaren txertaketaren nondik-norakoak edota  osasuna eta hizkuntza gaia landu zuen EHUko laugarren uda ikastaroaren inguruko informazioa. Gainontzeko aleen antzera, aldizkariaren helburua osasun arloko euskal komunitate zientifikoaren aurkikuntzak zein lanak zabaltzea du helburu, eta osagaiz.eus webgunean oso-osorik irakurtzeko aukera dago. Eman begiratu bat!

Bestalde, Osasungoa Euskalduntzeko Erakundearen (OEE) eta Udako Euskal Unibertsitatearen (UEU) elkarlanak azken urteetako lanaren aitortza jaso du. Izan ere, pasa den Euskararen egunean, abenduaren 3an, Donostialdea ESIak Osagaiz aldizkaria saritu du, euskararen erabileran eta normalizazioan eginiko lanagatik. Irudian ikus daitekeen bezala, saria erredakzio-batzordearen parte diren Izaskun Elezgaraik eta Joxerra Furundarenak jaso zuten. Halaber, argitaratu berri den azken aleko editorialean Joxerra Furundarenak sariaren inguruko balorazio txikia egiteaz gain, eskerrak eman dizkie Osagaizen ekoizpeneko parte-hartzaile guztiei.