Duela gutxi Osakidetzaren Euskarazko Estilo Liburua aurkeztu zen. Estilo-liburu horren helburua idazketa estilo bateratu bat finkatzea izan da, eta euskarazko testuen kalitatea zaintzea. Beraz, euskararen normalizaziorako urrats garrantzitsua da, erreferentzia argi bat ematen zaigulako denok euskarazko kalitatezko testuak idatzi ahal izan ditzagun osasun-arloan.

Esaterako, estilo-liburuan horrelakoak agertzen dira: noiz erabili ebakuntza eta noiz esku-hartzea? Gaztelaniaz biak dira "intervención" eta batzuetan gauza bera balira bezala erabiltzen dira, baina liburuan proposatzen zaigu ebakuntza arlo kirurjikoan erabiltzea eta esku-hartzea erizaintzan. Era berean, estilo-liburuan euskara inklusiboaren gaia jorratzen da: generoa, desgaitasuna, osasun-mentaleko terminoak, zahartzaroa...

Estilo-liburua hainbatentzat izan daiteke erabilgarria: osasun-langileak, administrariak, euskara-teknikariak...

Liburua Osakidetzako intranetean dago, eta tarteka eguneratuko dute. Intraneteko lotura hemen (Osakidetzako langileak soilik sar daitezke).