Apirilaren 1ean argitaratu zuen Nafarroako Hitzak OEEko kide den Jose Luis de Migueli egindako elkarrizketa (ikusi elkarrizketa osoa hemen). Bertan, OEEk Atarrabian antolatutako 31. Osasun Biltzarraz dihardute; COVID-19a eta gero zer?.  Jardunaldietako gaiaz honakoa dio Jose Luisek:

"Oso inportantea da aurrera begiratzea. Iltzatuta gelditu eta soilik atzera begiratzeak ez luke zentzurik. Edonola ere, kontua da ezin dela deus eman bukatutzat. Pasatu dugu seigarren olatua, baina, nork daki, agian etorriko da zazpigarren bat ere, eta gehiago haren atzetik. Edo beste pandemia bat. Zalantzak ditugu, eta, hain zuzen, hori nahi genuen izenburuan adierazi: galdera bat, bukatu gabeko esaldi bat."

Bestalde, Nafarroan euskarak bizi duen egoeraz ere mintzatu dira, osasungintzan bereziki. Bertan, pozik agertu da OEEko kidea, baina arretatsu; izan ere, egoera hoberantz joan arren, edozein unetan itzul daiteke abiapuntura.

"Osasungintza gero eta euskaldunagoa da, oro har. Problema da ez dagoela bermerik, hau da, egoeraren araberakoa da. Zortea izan dezakezu edo ez, eta horrek ez luke horrela behar. Kasualitatez-edo, ni lanean naizen osasun etxean, Orkoienen, hiru medikuak gara euskaldunak, baina hori salbuespena da erabat."