Imanol Larreak, Soziolinguistika Klusterreko Bulego teknikoko zuzendariak, euskararen erabilerarekiko kezka adierazi du Naiz irratirako egindako elkarrizketan. Hizkuntzen Kale erabileraren inguruko ikerketaren emaitzen arabera, euskararen erabilera egonkor mantentzen da. Horren harira, noski, poztasuna adierazi du Larreak. Hala eta guztiz ere, hizkuntzaren biziberritzeak bereziki kezkatzen du: euskara normalizaziotik urrun dago.

 

Xelebrea bezain harrigarria da gizarteak hautemandako eta benetan jazotako egoeren arteko aldea: Larreak aipatu arabera, euskararen erabilera eskasa gazteei leporatu ohi zaie; alabaina, helduengan murriztu omen da gehien. Paradoxiko izendatzen du helduek gazteen -eta batez ere haurren- inguruan euskarara jotzea baina, aitzitik, euren artean gaztelania erabiltzeak. Horren atzean, zer ote? Elkarrizketan zehar hipotesietan sakontzeaz gain, datuak datu, Larreak hobekuntzarako erabiltzeko nahia eta beharra azpimarratzen ditu.

 

Bestalde, komunikatzeko maizen erabilitako hizkuntzen hautuaren esangurari erreferentzia egiten dio. Zentzu horretan turistifikazio masiboak euskararengan duen eragin kaltegarriaz gain, beste herrialde batzuetatik etorritakoen aukeran zentratzen da. Izan ere, horietako askok beren hizkuntzak alde batera utzi eta hizkuntza hegemonikoen erabileran sartzen dira bete-betean. Alde horretatik euskararekin lan gehiago egin beharko zitekeela irizten dio.

 

Horrenbestez, Larrearen aburuz, erronka nagusia hizkuntza ohiturak aldatzea da. Horixe bera lortzeko hiru egitasmo zerrendatu eta azaldu egiten ditu elkarrizketan zehar. Badago argi eta garbi helarazitako mezua: jasotako datuak euskara suspertu, biziberritu eta ahal den heinean gizarteratzeko erabili behar dira; eta hori egitea hiztun ororen lana da.