32. Osasun Biltzarra: Osasunaren sustapena guztion ardura
4.10 Gizon eta emakumeen arteko ezberdintasun klinikoak zainketa intentsiboen unitate batean
Egilea: Felix Zubia Olaskoaga
0
Sarrera
Zainketa Intenstsiboen Unitateak (ZIU) unitate bereziak dira, bertara datozen pazienteak patologia akutu eta larria dutelako.
Helburuak
Lan honen bidez bertako gizon eta emakumeen artean dauden ezberdintasun klinikoak aztertu nahi dira, euren adinean, diagnostikoan eta bilakaeran.
Metodoak
Sarrera irizpideak: Donostialdea ESIko ZIUan artatu diren pazienteak.
Epea: 2022ko urtarrilaren 1etik abenduaren 31ra. Aldagaiak: sexua, adina, diagnostiko nagusia, arnasketa mekanikoaren (AM) beharra, giltzurrun ordezkatze tekniken (GOT) beharra, hilkortasuna, ZIUko egonaldia.
Azterketa estatistikoa: Aldagai kualitatiboak Χ karratua erabiliz konparatu dira, eta aldagai kuantitatiboak, aldiz, Student-en T froga erabiliz. Esangura estatistikoaren maila p < 0,05ean ezarri da.
Emaitzak
1495 paziente izan dira, adina 62,09 ± 16,16 urtekoa da, AMaren beharra % 39,7koa, GOTaren beharra % 5,1ekoa, eta egonaldia 8,64 ±12,22 egunekoa da.
Sexuari dagokionean, 513 emakume (% 35) izan dira, eta 952 gizon (% 65). Emakumeen adina gizonena baino handiagoa da (63,25 ± 17,12 Vs 61,46 ±15,59 urte, p < 0,05). Gizonetan nabarmen gehiago ematen diren diagnostikoak politraumatismoa (% 81,7 Vs % 18,3), shock septikoa (% 61,8 Vs % 38,3), arnas gutxiegitasuna (% 61,4 Vs % 38,4), biriketako tronboenbolismoa (% 63,8 Vs % 36,2), blokeo aurikulo-bentrikularra (% 60 Vs % 40) eta bihotz biriken geldialdia (% 74,5 Vs 25,5) dira. Ez da ezberdintasun hori nabari hemorragia intraparenkimatosoetan (% 50,8 Vs % 49,2), hemorragia subaraknoideoan (% 54,5 Vs % 45,5), iktus iskemikoan (% 52,6 Vs % 47,4), intoxikazioetan (% 50 talde bakoitzean), edo pankreatitis akutuan (% 45,5 Vs % 54,5). Gizonek gehiagotan behar dute AM (% 41,4 Vs % 36,6; p < 0,05), ez GOT (% 5,1 Vs % 5). ZIUko egonaldia oso antzerakoa da, eta ZIUko hilkortasuna pixka bat handiagoa gizonetan, baina ez da esangura estatistikora iristen (% 16,2 Vs % 14).
Ondorioak
Gure ZIUan gizon eta emakumeen arteko erlazioa 2:1 da. Diagnostiko nagusian ezberdintasun handiak daude, eta arnasketa mekanikoa gehiagotan behar izaten da gizonetan.
Azken Berriak
ELAk arreta euskaraz bermatzeko eskatu dio Osakidetzari
Euskararen pizkunde akademikoa: euskarak unibertsitatea behar du, eta unibertsitateak euskara
